تعلمون أنه ما عندنا سينما محلية والفن محصور ما بين المسرحيات اوالمسلسلات، وفي بعض التجارب السينمائية لكن برأيي فاشلة ..

انزين تخيلو معاي هالسيناريو …

محاولة جادة في عرض فيلم كويتي في السينما، يتمتع بالخصائص الآتية:

١. قصة متميزة ليست متكررة فيها قيمة مضافة (اخلاقية، اجتماعية ..الخ)

٢. جودة انتاج عالية – من حركات الكاميرات الى الإضاءة والصوتيات .. الخ

٣. تميز في أداء الممثلين

وكان التنفيذ عالي المستوى، والممثلين كويتين ومو بالضرورة معروفين

هل تتوقعون عمل مثل هذا ينجح في السينما أو لأ ؟ وليش ؟

ودي اسمع رايكم بكل صراحة.

صج انه حفل التخرج تأخر، وايد مو شويه، تقريبا سنة الا جم شهر، واللي توظف مرتين (مثل حالتي) واللي الله وفقه وتزوج، واللي واللي ، اهي حلاتها من اول ما نتخرج يسوون الحفل – عشان صج انحس بطعم التخرج – بس ما عليه صار اللي صار

احلى ما في هاليوم يمعة الربع، لبسنه الروب ووقفنا في ملعب كرة القدم اللي بجامعتنه ، وبعد الكلمة الإفتتاحية نادوا كل كلية بإسمها ولما يه الدور حق كليتي وقفنا يميع ورتفعت البالونات، وارتفعت الأصوات …

وقطيت كبوس التخرج فووووووووق – انا توقعت انه بتحول حق عقال ، بس للأسف طاح على راس واحد جدامي :) – اللي شاف هالفيديو اللي سويته يفهم قصدي :)

بعدين اشتغلت الالعاب النارية اللي كل وحدة اكبر من الثانية، عقبها رحت سلمت على امي وابوي – الله يحفظهم دايماً – وشفت ربعي وباركت لهم، وسلمت عالدكاترة اللي شفتهم

عقبها صورنه جم صورة جماعية منها هذي

[ picture uploaded soon ]

بعد ما انتهينه من الحفل رحت مع امي وابوي ووديتهم مطعم اعشيهم، لأنهم صج صج يستاهلون، ومن غيرهم انا ما اسوى شي، من فترة ما طلعت معاهم انا وياهم بس، بصراحة احلى ما في هاليوم اني شفت امي وابوي مستانسين، وهذي نعمة من ربي، ومهما اسوي ما راح اوفي بحقهم ولو ذرة – ربي ارحمهما كما ربياني صغيرا -